‘पूर्वगृहमन्त्री पक्राउ पर्ने आधार ‘सचिव पाण्डेको मोबाइल डाटा’

अपराध

- न्यूज नेपाल

काठमाडौं । नक्कली शरणार्थी प्रकरणमा प्रहरीले आज बुधवार पूर्वगृहमन्त्री बालकृष्ण खाणलाई पक्राउ गर्यो । उनलाई पक्राउ गर्न प्रहरीलाई सबैभन्दा ठूलो आधार तत्कालीन गृहसचिव टेकनारायण पाण्डेको मोबाइल फोन बनेको छ ।

प्रहरी स्रोतका अनुसार पाण्डेको मोबाइलका डाटाहरु रिकभर भएपछि खाणविरुद्ध प्रमाण जुटेको हो । पक्राउ पर्नुअघि पाण्डेले आफ्नो मोबाइल फर्म्याट गरेका थिए । त्यसलाई प्रहरीले प्राविधिकहरुमार्फत रिकभर गरेको छ ।

पाण्डेको मोबाइलमा खाणसँगका संवादहरु भेटिएको प्रहरी स्रोतले सञ्चारमाध्यमलाई जानकारी दिएको छ । खाण र पाण्डेबीच स लेनदेनका कुराहरु पनि गरिएको स्रोतको दाबी छ । सचिव पाण्डेले पनि आफ्नो बयानमा यो कुरा स्वीकारेका छन् । खाणले भने आफूमाथिको आरोप स्वीकार गरेका छैनन् ।

जिल्ला अदालत काठमाडौंले नक्कली भुटानी शरणार्थी प्रकरणमा अनुसन्धानका लागि पक्राउ परेका पूर्वगृहमन्त्री बालकृष्ण खाँणलाई ३ दिन थुनामा राखेर अनुसन्धान गर्न प्रहरीलाई अनुमति दिएको छ । बुधबार न्यायाधीश उत्तम सिलवालको इजलासले खाँणलाई हिरासतमा राखेर अनुसन्धान गर्न प्रहरीलाई अनुमति दिएको हो ।