कोभिड–१९ विरूद्धको खोप विकास गर्ने दुई जना वैज्ञानिकले पाए चिकित्सा विज्ञानमा नोबेल पुरस्कार

रोचक

- न्युज नेपाल

काठमाडौं । सन् २०२३ को फिजियोलोजी तथा मेडिसिनतर्फको नोबेल पुरस्कार कोभिड–१९ विरुद्धको एमआरएनए खोप विकासमा योगदान गर्ने दुई वैज्ञानिकलाई प्रदान गरिएको छ ।

कोभिड–१९ विरुद्ध न्युक्लियोसाइड बेस परिमार्जन गर्दै प्रभावकारी एमआरएनए खोप विकासलाई सक्षम बनाएकोमा क्याटालिन कारिको र ड्र्यू वेइसम्यानलाई नोबेल पुरस्कार प्रदान गरिएको हो ।

नोबेल फाउन्डेसनले सामाजिक सञ्जाल ट्विटरमार्फत दुवै जनालाई पुरस्कार प्रदान गरिएको जानकारी दिएको छ ।

नोबेल पुरस्कार समितिले आधुनिक समयमा मानव स्वास्थ्यको सबैभन्दा ठूलो खतराका बेला खोप विकासमा अभूतपूर्व योगदान दिएकोमा उनीहरूलाई पुरस्कार दिइएको हो ।

परम्परागत खोप जुन भाइरसविरुद्धको हो, सोही भाइरसको कमजोर स्वरूप प्रयोग हुने गर्छ । एमआरएनए खोपमा सामान्यतया भाइरसको बाहिरी झिल्लीमा पाइने प्रोटिनको सानो टुक्रालाई प्रयोग गरिन्छ ।

कोभिड महामारी सन् २०१९ को अन्त्यमा चीनको वुहान सहरबाट सुरू भएर संसारभरि फैलिएको थियो। कुनै खोप र उपचार नभएको कोभिड–१९ ले संसारभरिका झन्डै ७० लाख मानिसको मृत्यु भए भने करोडौं मानिस यो भाइरसबाट संक्रमित भएका थिए ।