प्रहरीलाई दुरव्यवहार गर्ने वडाध्यक्ष पक्राउ !

अपराध

- न्युज नेपाल

काठमाडौं । सर्लाहीको गोडैतास्थित प्रहरी चौकीमा आक्रमण तथा प्रहरीलाई कुटपिट गरेको आरोपमा एक वडाध्यक्षलाई प्रहरीले नियन्त्रणमा लिएको छ ।

गोडैता नगरपालिका–७ का वडाध्यक्ष विनेशकुमार दासलाई प्रहरी कुटपिट तथा प्रहरी चौकीमा आक्रमण गरेको आरोपमा प्रहरीले नियन्त्रणमा लिएको हो ।

दुर्गा पूजाका लागि चन्दा उठाउने विषयमा स्थानीय कारी यादवलाई रामनगर गाउँपालिका–५, अनिल राय यादवलगायतले कुटपिट गरेको विषयमा असोज–१७ गते प्रहरी चौकीमा पंचायती (छलफल) चलिरहेको बेला प्रहरी तथा चैकीमा आक्रमण भएको थियो ।

वडाध्यक्ष दासको नेतृत्वमा प्रहरी चौकी गोडैतामा ढुंगामुढा हुँदा सइ अवधेशप्रसाद यादवको दुई दाँत भाँचिएको र पाँच प्रहरी घाइते भएको प्रहरीले जनाएको छ। प्रहरीले उनलाई कुटपिट, अङ्गभङ्ग, ज्यान मार्ने उद्योग र आपराधिक उपद्रो मुद्दामा मलंगवामा राखी अदालतबाट म्याद थप गर्ने तयारी गरेको छ।

वडाध्यक्षको गिरफ्तारीको विरोधमा गोडैता बजार बन्द गरिएको छ भने मेयर देवेन्द्रकुमार यादवले राजनीतिक पूर्वाग्रहका कारण दासलाई पक्राउ गरिएको दाबी गरेका छन्।