संखुवासभा कैदि हत्या प्रकरणमा सुरक्षाा इन्चार्ज सहित १५ जना विरुद्ध कर्तव्य ज्यान मुद्धा दायर

अपराध

- न्युज नेपाल

काठमाडौं । संखुवासभा कारागारमा दुई कैदिको हत्या प्रकरणमा कारागारका तत्कालीन सुरक्षाा इन्चार्ज सहित १५ जना विरुद्ध कर्तव्य ज्यान मुद्धा दायर गरिएको छ ।

गत साउन २४ गते जिल्ला कारागार संखुवासभामा कैदीहरु विनोद तोलांगी र आकाश बलामीको हत्या प्रकरणमा प्रहरीले अनुसन्धान प्रतिवेदन जिल्ला सरकारी वकिल कार्यलय मार्पmत शुक्रबार सात प्रहरी र आठ कैदी गरी १५ जना विरुद्ध जिल्ला अदालत संखुवासभामा कर्तव्य ज्यान मुद्धा दर्ता गरेको हो ।

जिल्ला अदालत संखुवासभा स्रेस्तेदार रामचन्द्र केसीका अनुसार मुद्दा दायर हुनेमा कारागारका तत्कालीन सुरक्षा इन्चार्ज प्रहरी साहायक निरिक्षक लक्ष्मि चौधरी, हवल्दार राजकुमार श्रेष्ठ तथा प्रहरी जवानहरु सुमन गुरुङ, पवनकुमार महतो र मनिष राई रहेका छन् । त्यस्तै घटनाका बखत सुरक्षा गार्डका रुपमा तैनाथ दमन सिंह राई, सुमन राई विरुद्ध मुद्दा दर्ता गरिएको छ । कैदीबन्दीहरु राम कार्की, अनिस शर्मा कट्टेल ,सचिन राई , सुमन सारुमगर , टीकाराम चौहान , नवीनकुमार राई, इन्द्रध्व्ज घिमिरे, मीनबहादुर तामाङविरुद्ध कर्तव्य ज्यान मुद्दा दर्ता गरिएको छ । मुद्दा हेरेर प्रतिवादिलाई अदालतमा उपस्थित गराएर आइतबारदेखि नै बयान लिइने केसीले बताए ।

गत साउन २४ राति बन्दीगृहको सौचालयबाट झ्याल फोडेर भाग्न खोजेको भन्दै आघात र क्रुरतापूर्वक यातना दिएर दुई जना कैदिको हत्या गरिएको थियो । त्यस घटनालाई आन्तरीक रुपमा छामछुम पार्न खोजे पनि प्रहरीको सुरक्षा घेरा भित्र कैदिबन्दीको मृत्यु शंकासपद रहेको भन्दै स्थानिय र आफन्तले विरोध र छानबिनको माग गरेका थिए ।

घटनाको छानबिनका लागि कारागार विभागका उपसचिव कमलप्रसाद पाण्डेको नेतृत्वमा समिति गठन गरि अनुसन्धान अघि बढाईएको थियो । उक्त समितिले कारागार भित्रको सिसिटिभी फुटेज हेरेपछि कैदी र प्रहरीको संलग्नता रहेको प्रतिवेदन दिएको थियो । आफन्तले आन्दोलन गर्दै कारागारका सुरक्षा इन्चार्ज लक्ष्मि चौधरी र कारागार प्रमुख जेलर राजेन्द्र घिमिरेविरुद्ध किटानी जाहेरी दर्ता गरेपछि मात्रै ६ दिनमा आफन्तले शव बुझेका थिए । २५ जना क्षमताको संखुवासभाको कारगारमा अहिले १ सय ३६ जना कैदीबन्दी छन् ।