सुन तस्करी प्रकरणमा क्रिप्टोकरेन्सीको कारोबार पनि जोडियो

अपराध

- न्युज नेपाल

काठमाडौं । त्रिभुवन अन्तर्राष्ट्रिय विमानस्थल बाट बरामद गिरएको ६० किलो ७ सय १६ ग्राम सुन प्रकरणमा केन्द्रीय अनुसन्धान ब्यूरोले अवैध भर्चुअल मुद्रा क्रिप्टोकरेन्सीको कारोबार पनि जोडिएको पाइएको छ ।

त्रिभुवन अन्तर्राष्ट्रिय विमानस्थलबाट बरामद गरिएको उक्त सुन तस्करी प्रकरणमा तस्कर समूहले सुनको पेमेन्टका लागि क्रिप्टोकरेन्सीमा कारोबार गर्ने गरेका अनुसन्धानका क्रममा खुलेको केन्द्रीय अनुसन्धान ब्यूरो (सीआईबी) का एक अधिकृतले बताएका छन् ।

‘केही पैसा हुण्डीबाट पनि गएको देखिन्छ भने ठूलो रकम क्रिप्टोमार्फत कारोबार भएको पाइएको छ’, अनुसन्धानमा संलग्न एक अधिकृतले बताएका छन्, उनले भने, ‘यो विषयमा विस्तृत अनुसन्धान भइरहेको छ ।’

स्रोतका अनुसार, सुन तस्करी प्रकरणमा क्रिप्टो जोडिएपछि सीआईबी सुन प्रकरणको अनुसन्धान समितिमा सीआईबीका डिजिटल फरेन्सिक प्रमुख एसपी एमएम धामीलाई पनि अनुसन्धान खटाएको छ । स्रोतका अनुसार, क्रिप्टोकरेन्सी सम्बन्धी अनुसन्धानको विज्ञका रुपमा उनलाई अनुसन्धानमा जोडिएको हो ।

अनुसन्धानमा संलग्न एक अधिकृत भन्छन्, हालसम्म अनुसन्धानबाट खुलेका तथ्यहरु हेर्दा तस्करीमा संलग्न यो गिरोह सोचेभन्दा निकै धेरै संगठित देखियो’, ‘हालसम्म सीआईबीले हेरेका संगठित अपराधका केशहरुमध्ये यसमा सबैभन्दा धेरै अत्याधुनिक प्रविधि प्रयोग भएको देखिएको छ ।’

सुन प्रकरणमा अहिलेसम्म सीआईबी ६ जना विदेशी नागरिक सहित २४ जना व्यक्तिलाई पक्राउ गरेर अनुसन्धान अघि बढाएको छ । यसमा प्रकरणमा चिनियाँ नागरिकको मुख्य भूमिका देखिएको छ भने नेपाली मूलका बेल्जियम नागरिक दावा छिरिङले सुनको व्यवस्थापन गर्ने गरेको हुनसक्ने आधारहरु अनुसन्धान बाट देखिएको छ ।