फ्रान्सेली आइरिस बनिन् मिस युनिभर्स

एजेन्सी  । फ्रान्सकी २३ वर्षीया सुन्दरी आइरिस मित्तेनायरेले यस वर्षको मिस युनिभर्सको उपाधि जितेकी छन् । सोमबार फिलिपिन्समा सम्पन्न प्रतियोगितामा ताज पहिरिएपछि मिस फ्रान्ससमेत रहेकी आइरिसले मानिसको दाँत र मुखको स्वच्छता र सुरक्षार्थ आफ्नो उपयोगिता सिद्ध गर्ने बताएकी छन् । त्यसो त उनी डेन्टल सर्जन बन्ने लक्ष्यसहित अध्ययनरत छिन् । मिस युनिभर्स उपाधिका लागि यस संस्करणमा विश्वभरका ८६ सुन्दरी सहभागी थिए ।

फ्रान्सले आइरिस सुन्दरीको ताजसँगै दोस्रोपटक मिस युनिभर्सको ताज जितेको हो । यसअघि सन् १९५३ मा क्रिस्टियान मार्टेलले जितेपछि झन्डै ६३ वर्षको ताज खडेरीलाई आइरिस मित्तेनायरेले तोडिदिएकी हुन् । फ्रान्सको उत्तरी भेगमा रहेको लिली सहरकी उनले मिस युनिभर्सका लागि आफ्नो नाम घोषणा भएपछि खुसीले अत्तालिँदै मुख छोपेकी थिइन् । आइरिसलाई गतवर्षकी मिस युनिभर्सले ताज पहिर्‍याइदिएकी थिइन् ।

त्यसैगरी, २५ वर्षीया मिस हाइटी राक्वेल पेलिसायरले फस्र्ट रनरअपमा चित्त बुझाउनुपर्‍यो भने मिस कोलम्बियन २३ वर्षीया सुन्दरी एन्ड्रिया तोभार मिस युनिभर्सको सेकेन्ड रनरअप भइन् । हाइटी सुन्दरी सन् २०१० को महाभूकम्पपीडित पनि हुन् भने कोलम्बियाली सुन्दरी तोभार डिजाइनर र फोटोग्राफर पनि हुन् ।

‘मलाई लाग्छ, फ्रान्स र युरोप दुवैले मिस युनिभर्सको ताज निकै चाहिरहेका थिए,’ मिस युनिभर्स आइरिसले उपाधिपछिको पत्रकार सम्मेलनमा आफ्नो उपाधि त्यसैले पनि बढी महत्त्वपूर्ण रहेको जिकिर गरेकी थिइन् । उनले सौन्दर्य प्रतियोगिता फ्रान्समा खासै लोकप्रिय नरहेको उल्लेख गर्दै थपिन्, ‘तर पनि फ्रान्सेली जनताले उपाधिप्रति अब प्रेम दर्साउने छन् र प्रत्येक वर्ष मिस युनिभर्स हेर्नेछन् ।’ उनले आफूले क्राउनलाई युरोप भित्र्याउन पाउँदा गर्व महसुस गरेको बताइन् । मिस युनिभर्सले अब उप्रान्त बच्चा र खासगरी युवतीलाई स्कुल भर्ना गराउनेतर्फ पनि आफ्नो अभियान थालिने बताएकी छन् ।

Comments