कुमारको ‘सुगम’ सार्वजनिक

काठमाडौं । सुमधुर आधुनिक तथा पप गीतहरुको संगालो ‘सुगम एल्बम’ लिएर कुमार गुरुङ्ग नेपाली सांगीतिक आकाशमा उदाएका छन् । सोमबार थाहा सञ्चार नेटवर्क मार्फत् देशभरी ११० भन्दा धेरै रेडियोहरुबाट एक साथ प्रसारण हुने कार्यक्रम ‘बहकिने मन’ मार्फत् उनको एल्बम सार्वजनिक गरिएको हो । गायक तथा नायक यशकुमार र कवि रावतले संयुक्त रुपमा सुगम विमोचन गरेका हुन् ।

‘बहकिने मन’ शीर्षकको गीत बजाएर एल्बम विमोचन गरिएको उक्त कार्यक्रममा सोही एल्बमका ‘हे मायालु’ र ‘एक नदी’ बोलको गीत पनि प्रसारण गरिएको थियो । कार्यक्रमका प्रस्तोता महावीर विश्वकर्माले कुमार गुरुङ्ग, यशकुमार र रावतसँग सोही एल्बममा आधारित भएर प्रश्नोत्तर गरेका थिए ।

पोखरामा भोलाप्रसाद राईसँग शास्त्रीयमा आधारित संगीत अध्ययन गरेको दिन सम्झिँदै कुमारले आफू आत्मसन्तुष्टिको लागि सांगीतिक क्षेत्रमा लागेको बताए ।  कुमार गुरुङ्गसँगको १० वर्ष पुरानो चिनजान सम्झिँदै यशकुमारले कुमारको स्वर सुगम संगीतको लागि एकदमै ‘म्याच’ गर्ने विचार राखे । साथै उनले अहिले हल्काफुल्का गीतहरु चर्चित भइरहेको समयमा कुमार गुरुङ्गको उपस्थितिले सुगम संगीतलाई बलियो बनाउनेछ भन्ने आशा गरे । “कुमार गुरुङ्गलाई दोहो¥याएर विदेश जानुपर्ने अवस्था नआओस्” उनले भने “स्वदेशले नै उहाँलाई एउटा सर्जकको रुपमा स्थापित गराउँछ” ।
त्यस्तै कवि रावतले ‘सुगम’ एल्बमको गीतहरु सुन्दा बच्चामा हजुरआमाबाट लोरी सुन्दा जस्तै आनन्द लागेको बताए । “पेन किलर खाएको जस्तो महसुस भयो” उनले भने, “यसले कुमार जी को भविष्य उज्यालो छ भन्ने निश्चित गर्छ” ।
‘सुगम’मा यशकुमार, सेन्चुरी सुरेश घमाल, सिन्धुलीयन गुराँस र रेशम श्रीसले लेखेका ६ वटा गीतहरु समावेश छन् । त्यस्तै ४ वटा गीतमा कुमार आफैले सँगीत भरेका छन् भने बाँकी २ मध्ये ‘हे मायालु’मा यशकुमार र ‘हाम्रो प्रेमको’ मा दिपक शर्माले सँगीत भरेका छन् । अमर प्रेम म्युजिक प्रा.लि.ले एल्बमको बजार र वितरणको जिम्मा लिएको छ ।

Comments