मार्मिक रोशनले ल्याए ‘चाँदनी’

काठमाडौं । युवा गजलकार मार्मिक रोशनले ‘चाँदनी’ गजल संग्रह लिएर आएका छन् । भक्तपुरमा आयोजित एक कार्यक्रममा रोशनको उक्त संग्रह वरिष्ठ गजलकार डा.कृष्णहरि बरालसँगै अन्य स्रष्टाले संयुक्त रूपमा  विमोचन गरे । बरालले उक्त संग्रहमा व्यङ्ग्य र प्रेमका गजल समेटिएको वताए । रोशनले आफ्नो भावलाई पगालेर गजल लेखेको वताउँदै लोककथाहरूको सन्दर्भ गजलमा ल्याएर नयाँ सन्दर्भमा जुन प्रयोग गरिएको छ वास्तवमा यो प्रशंसनीय रहेको बरालको भनाई छ । उनले हरेक गजलकार आफैंमा एउटा समालोचक भएको पनि वताए । उनले भने, ‘कविताको समालोचना अर्कैले गरिदिनुपर्छ । उपन्यासको समालोचना अर्कैले  गरिदिनुपर्छ । तर, गजलको समालोचक आफैं हो ।’
त्यस्तै कार्यक्रममा उपस्थित स्रष्टाहरूले आ–आफ्नो रचना वाचन पनि गरेका थिए ।

संग्रहबाट केही लाइनहरू

के बनाउछौं सरकार यो देश तिमीले
तिमीभन्दा राम्रो बरू कमिलाले बनाउँछन् ॥

उसका जीवनमा त धेरै भोगाइहरू छन्
र त आफ्ना गजलहरू चोटिलो बनाउँछन् ॥

यता सडकहरू भत्किन्छन्, जिर्ण हुन्छन्
उता मन्त्रीहरुको घरमा तला थपिन्छन् ॥

घरी आएको हुन्छ, घरी नआएको हुन्छ
जसरी पनि तिम्रो यादले सताएको हुन्छ ॥

हिजो खरायोसँग दौड जितेपछि
आज चरालाई जित्न कछुवा निस्कियो ॥

यौटा गरिब आङ ढाक्न दगुर्छ
सुनेर कालो झण्डा फालाफाल छ ॥

उता कहाँ कहाँ खोजेनन् विश्वलाई
यता सहिदको मुटुमा जगत भेटियो ॥

देख्ने कुरा केवल आँखाले देख्यो
आफू हिड्ने बाटो पैतालाले देखेनन् ॥

सानो छोरोले आज किसानलाई भन्यो
म ठूलो भएर एउटा नहर बनाउँछु ॥

जीवन के हो कसलाई कसलाई सोध्छौ ?
मलामी जाऊ चित बनाऊ पत्ता लाग्छ ॥

खुकुरी अगाडी पनि ऊ छाती थापिरहन्छ
मलाई अचानो सारै बहादुर जस्तो लाग्छ ॥

झुपडीमा एकै छाक पकाइदिन पनि
बडो मुस्किल भैदियो चुलोका लागि ॥

तिमी अध्ययन गर आजकालको यो दुनियाँ
घाउ बनाइदिन्छ अनि मलम देखाउछ ॥

Comments